دكتر جواد هیئت‌له دانیشیق
دكتر جواد هیئت:
آذربایجانین، باكی نین بوگونكو انكشافینی گؤرمك منه حیاتین بوتون نعمتلریندن شیریندیر.
آذربایجان خالقی قدیم تاریخی، زنگین مدنیتی ایله تانیندیغی كیمی، عصرلر بویو دونیا شؤهرتلی شخصیتلری ایله ده سئچیلمیشدیر. لاكین یوزایللر بویو آذربایجان تورپاقلاری یاد ائللی‌لر طرفیندن ایشغال، تالان ائدیلدیگی كیمی، اونون تاریخی، مدنیتی، او جومله‌دن گؤركملی شخصیتلری ده دهشتلی رئپرئسسییالارا معروض قالمیشدیر. بؤیوك تاریخی شخصیتلریمیزین اثرلری نین، حتّی میللی منسوبیت‌لری نین باشقا خالقلار طرفیندن منیمسنیلمه‌سی بونلاردان دا دهشتلی‌دیر. معلوم اولدوغو كیمی، یالنیز «حیدر علی‌یئو»ین سیاسی حاكیمیتی دورونده یوخاریدا قئید اولونان تجاووز پروسه‌سی نین قارشیسی قطعیت‌له آلینمیشدیر. همین دورده آذربایجان خالقی، اونون تاریخی، مدنیتی و ائلجه ده گؤركملی شخصیتلری دونیادا اولدوغو كیمی تانیدیلمیشدیر. زامان اؤتدوكجه حیدر علی‌یئو شخصیتی نین بؤیوكلوگو داها آیدین گؤرونور، بو داهی اینسانین ابدیته قوووشماسیندان كئچن زامان مسافه‌سی بیزدن اوزاقلاشدیقجا اونون اؤلمز ادعالاری اوجا زیروه‌لر فتح ائدیر، اوجالدیقجا دا اؤز توكنمز شؤله‌سی ایله آذربایجانین تاریخینه و معاصیرلیگینه سؤنمز شفق ساچیر. اولو اؤندر حیدر علی‌یئوین آذربایجان خالقی قارشیسینداكی خیدمتلری ایله باغلی فیكیر و ملاحظه‌لرینی اؤیرنمك اوچون بو ایلین ماییندا 85 یاشینی تاماملامیش دونیا شؤهرتلی جراح، گؤركملی عالیم و ایجتیماعی خادیم «جاواد هئیت»ه مراجعت ائتدیك.
- جاواد هیئت 85 ایللیك یوبله‌یینی هانسی احوال- روحیه ایله قئید ائتدی؟
- ایلك نوبه ده، منه گؤستریلن سونسوز دیقته گؤره پرئزیدئنت ایلهام علی‌یئو باشدا اولماقلا، بوتون آذربایجان خالقینا مینت‌دارلیغیمی بیلدیریرم. آذربایجان جمهوریتی نین الده ائتدیگی نایلیت‌لری سونسوز سئوینج حیسی ایله قارشیلاییرام. خصوصیله قئید ائتمك ایسته‌ییرم كی، شوروی بیرلیگی دورونده آذربایجان دیلی نین قارشیلاشدیغی پروبلئم‌لر منی یئنی‌یئتمه یاشلاریمدان ناراحات ائتمه‌یه باشلامیشدیر. حیدر علی‌یئو بیرینجی دفعه سیاسی حاكیمیته گلدیكدن سونرا توتالیتار شوروی رژیمی نین آمانسیز قاداغالارینا باخمایاراق، آنا دیلیمیز دولت دیلی كیمی قبول اولوندو. بو، یوزایللر بویو حلّینی گؤزله‌ین میللی مفكوره مسئله‌سی ایدی. من 85 یاشیمی بؤیوك ایفتیخارلا قئید ائدیرم. چونكی اولو اؤندر حیدر علی‌یئوین ایده‌لری یاشاییر، آذربایجان دیلی آیری خالقلارین دیللری آراسیندا ساییلیب- سئچیلیر، حؤرمتله قارشیلانیر. هله روس دیلی نین حكمران اولدوغو شوروی دورونده حیدر علی‌یئوین آذربایجان دیلینده ساعاتلارلا سربست و ثلیث دانیشماسی منی واله ائدیردی. من همیشه دوشونموشم كی، آنا دیلینی سئومه‌دن اونو دریندن منیمسه‌مك اولماز. حیدر علی‌یئو، سؤزون اصل معناسیندا، آنا دیلیمیزه توكنمز محبتی ایله هامیمیزا اؤرنك اولموشدور. سئوینیرم كی، اولو اؤندریمیزین معین ائتدیگی ایشیقلی یول پرئزیدئنت ایلهام علی‌یئو طرفیندن اوغورلا داوام ائتدیریلیر. آذربایجانین دولت باشچیسی خالقیمیزا بؤیوك محبتله، ایناملا و جسارتله اؤلكه‌میزی ایشیقلی گله‌جگه دوغرو آپاریر. من پرئزیدئنت ایلهام علی‌یئوه داها بؤیوك و محتشم قلبه‌لر، آذربایجان خالقینا خوش رفاه و امین-آمانلیق آرزولاییرام.
- آذربایجانین ایندیكی اینكیشاف سویییه‌سی سیزی قانع ائدیرمی؟
- خوشبختلیك ائله بیر مفهوم‌دور كی، او، هر آداما قیسمت اولمور. بو معنادا من حقیقتن چوخ خوشبخت اینسانام. یاخشی یادیمدادیر، اولو اؤندر حیدر علی‌یئوین 1992-جی ایلده «نخچیوان» قزئتینده «اینسان خالق اوچون یاشایاندا خوشبخت اولور» سرلوحه‌لی مصاحبه‌سی درج اولونموشدو. مصاحبه، سؤزون اصل معناسیندا، حیات فلسفه‌سی ایله زنگین فیكیرلر توپلوسو ایدی. همین مصاحبه منی چوخ دوشوندوردو. دئیه بیلرم كی، من ده دوغما وطنیمه، آنا دیلیمه و خالقیما قلباً و روحاً باغلییام. هر بیر اینسانین قلبینده گؤزل آرزولار كؤك سالیر. منیم ده ان بؤیوك آرزوم آنا دیلیمیزی ساییلان، مملكتیمیزی گؤزل و فراوان، خالقیمیزی آزاد گؤرمك اولموشدور. آرتیق عؤمرومون 85 ایلی آرخادا قالمیشدیر. بو اوزون زامان كسیگینده دونیادا چوخ شئی دییشمیشدیر. بو دییشیكلیكلر ایچینده خالقیمیز اوچون ان دیَرلی‌سی و تاریخی اهمیتی ایله سئچیله‌نی آذربایجان جمهورتی نین موستقیل‌لیگی‌دیر. موستقیل‌لیگی قازانماق نه قدر چتیندیرسه، اونو قورویوب ساخلاماق، انكشاف ائتدیرمك، مملكتی گؤزللشدیرمك داها چتیندیر. من سئوینیرم كی، پرئزیدئنت ایلهام علی‌یئو بوتون بو چتینلیكلره عزمله‌سینه گریر. مملكتیمیز گوندن-گونه گؤزل‌لشیر. دوغما باكیمیز قیسا بیر واختدا بؤیوك انكشاف یولو كئچه‌رك نیویورك‌ون سویییه‌سینه یاخینلاشمیشدیر. آذربایجانین، باكی نین بوگونكو انكشافینی گؤرمك منه حیاتین بوتون نعمتلریندن شیریندیر.
بؤلوم : مصاحبه با دكتر جواد هیئت (دوكتور جواد هیئت ایله دانیشیق) یازار : VARLIQ 0 باخیش