میللی قهرمان: علی كمالی/ دوكتور جواد هیئت

یکشنبه 18 دی 1390


 


 

 

 

بسم الله الرحمن الرحیم

الله هامییا ساغلیق وئرسین و سیزلری ده منیم كیمی قوْجالتسین. عزیز دوستلاریمیز بیزدن ایسته­میشلركی, آنا دیلیمیز حاقّیندا چوْخ آز دا اوْلسا دانیشیم و من ده عوٍذز ایستهمیشدیم. چوٍنكو بو مجلیس درس كیلاسیندان یوخاری بیر مجلیس دیر. خصوصاٌّ كی آللاهین ائوینده, ان موٍقدّس سایدیغیمیز مسجیدده تشكیل تاپیب. آمما بیردن یادیما دوٍشدو كی, بیزیم بیر وظیفه- میلّی, شرعی, اینسانی بورجوموز وار. نئجه كی بورا ییٌغیشمیشیق گئچمیشدهكی بؤیوكلریمیزدن دانیشاق و اوْنلارین روحو اوٍچون فاتحه اوخویاق و صلوات چئویرك. اونلارین هوٍنر و فضیلتلریندن دانیشاق. بیزه وظیفهدیر كی بئله بیر آداملار اگر دیری ایسهلر و آرامیزدادیلارسا, اونلارداندا آزاجیق دانیشاق. نئجه كی مندن اول بیر خطیبیمیز سؤیلهدی: من لم یشكر الخلق كیف یشكر الخالق. بیزده عادت بودور كی یا قدرتده اولان آدامدان تعریفلرلر یا دا اؤلندن سورا. آمما اؤلندن سورا بؤیوك آداملاردان مجد ائتمك, تعریف ائتمك, مدح ائتمك بیر میلی وظیفهدیر. نئجه كی اوستاد شهریار, تیلیمخان, اوستاد قشمدن بوردا دانیشماق, مدح ائتمك, تمجید ائتمك ده بؤیوك ثوابدیر. آمما ائله­جه ده آرامیزدا اولان كمالیدن دانیشماق و اونون كمالاتیندان دا بیر پارچا بوردا سؤز ائتمك منجه بؤیوك بیر اینسانی وظیفهدیر. چوٍنكو بیزه بو بؤیوك تیلیم خانی تانیدان بو كمالیدیر. یالنیز بیزه دئییل, بؤیوك وطنیمیز ایرانا حتّی دوٍنیایا تیلیم خانلاری تانیتدیران كمالیدیر. اؤزو دئدیگی كیمی قارا بولود آلتیندان چیخاران اودور. اوناگؤره من اؤزومه وظیفه بیلدیم كی سكوت ائتمهیم, سوسمایام, بلكه 13 ایلدن بری حیس ائتدیگیم, دویدوغوم دویغولاردان سیزه بیر آز دانیشام. كمالی منجه بیزیم بؤیوك میلّی قهرمانیمیزدیر. قهرمان او دئییل كی فقط بیر دوٍشمنی یئره وورسون و حریفینه غالب گلسین. خلقینین فضیلتلرینی قارا بولود آلتیندان ایشیقلیغا چیٌخاران آدام قهرماندیر. من 13 ایلدن بری كمالیایله تانیشام. اگر اونو كمالی دئیه خطاب ائدیرسم منی عفو ائتسینلر. من كمالیدن یوخاری بیر كمال گؤرهبیلمیرم. اونون اوٍچون ائله اونا چیلخا, یاپا- یالین آدیایله خطاب ائدیرم حقیقتاٌّ الاسماء تنزل من السماء. حقیقتاٌّ مسمّالی بیر ایسیم: كمالی. اؤزو ده كیچیك آدی علی. همیشه آللاهدان ایستیرم كی علی اونون الینی توتسون و قیامتده ده علیایله محشور اولسون. من اونا بوندان بؤیوك دعا ائدهبیلمَرم.

13 ایلدی بیز دیلیمیزین, ادبیاتیمیزین و فرهنگیمیزین احیاسی اوٍچون چالیشیریق. پهلوی رئژیمینده تابدالانمیش, قدغن, یاساق ائدیلمیش, دیلیمیزی تازادان دیرچلتمك اوٍچون ایشلیریك. اونون اوٍچون یاخیندان بیربیریمیزی تانیریق. بیزیم یازیچیلار, شاعیرلریمیز كمالییی بیر میلّی قهرمان كیمی تانیرلار. من اونا غبطه ائدیرم. او 13 ایلدن بری هر واقت وارلیق چیخار اؤز جیبیندن وارلیق دان 300 دانا آلار, ساوا و ساوا كندلرینده پایلار و ساوالی قارداشلارینا و قارداشلاریمیزا دیللرینی, گؤزل ادبیاتلارینی اؤیرتمگه چالیشار. من اونون بو فداكارلیغینا هم حئیرانام, هم غبطه ائدرم. آللاه اونون كیمیلرینی بیزیم ائلیمیز ایچینده زیاد ائتسین, آرتیرسین. چوٍنكو كمالی كیمی صاحیب كمال بیزده یوخ كیمیدیر و بوگوٍن بیزیم بو حالدا قالماغیمیزا سبب ده بو اولموشدور. بیزده میلیونر, میلیاردر چوخدور, بازار بیزیم الیمیزدهدیر پییاسا, بورس بیزیم الیمیزدهدیر؛ آمما فرهنگیمیز یئتیم قالمیشدیر. چوٍنكو بیز هئچ دیلیمیزه, فرهنگیمیزه (فیكیر وئرمگه) پول قازانمادان فوٍرصت, ماجال تاپانمیریق. كمالی اؤز عؤمرونو, جوانلیغینی, ثروتینی, عائیله حیاتینی بونون اوٍچون فدا ائتمیش. اوٍمید ائدیرم آللاهین یاردیمیایله, جمهوری اسلامینین یاردیمیایله, تیلیم خانین مقبرهسی اونا لاییق بورادا تیكیلسین و اونون اؤنونده بو میلّی قهرمانیمیزین دا هیكلی تیكیلسین. من هم علی كمالی یه آللاه دان توفیق, ساغلیق, اوزون ایللر موفقیتله چالیشماسینی دیلهییرم. هم ده آللاهدان یالواراراق ایسته­ییرم كی كمالی كیمیلری بیزیم ائلیمیزده چوخالتسین. چوخ ساغ اولون. 

جومعه آخشامی۴/۷/۱۳۷۰ - حكیم تیلیم خان بیرینجی قورولتایی-ساوا-مرغئی- آشاغی قالا مسجیدی.

=====

قایناق: یادنامه حكیم تیلیم خان كیتابی

یازان: دوكتور جواد هیات 

 


 

آچیقلاما: 

دوكتور علی كمالی ۱۳۷۵ مرداد آیینین اون بیرینده (تقریبا 15 ایل اؤنجه) تهراندا وفات ائتمیش، مزاری بهشت زهرانین ۳۲ ینجی قطعه سینده دیر. روحو شاد اولسون.   

 



بؤلوم : مقالات دكتر جواد هیئت (دوكتور هیئتین مقاله لری) یازار : VARLIQ 0 باخیش


 

بلاگا گؤره

    بؤیوك اینسانلاردان دانیشماق چتیندیر . اونلارین حیاتلاری، چالیشمالاری و اؤزللیكله ده اوركلری او قدر بؤیوكدور كی، بیر یازییا سیغیشماز.
    دوكتور جواد هیئت بو اینسانلاردان بیری‌دیر!


سایغاج