پیچاق و قلم! (دكتر "جواد هیئت"ه ایتحاف)
بیچاق – قلم
« وارلیق » مجلّه سی نین ناشیری جرّاح – ادیب جواد هیئته ایتحاف
اینسانا خیدمتدیر مرامین سنین
سن عؤمرون بویونجا عؤمور اوزاتمیسان.
جرّاح بیچاغییلا مین – مین خسته نین
آغرئ – آجیسینئ كسیب آتمیسان
خسته یله برابر سئویندین سنده
جیسمانی بیر درده علاج ائدنده...
معنوی دردلرسه قالدئ علاجسیز
بس اونون درمانئ نه ایمیش گؤرن؟
جرّاح بیچاغییلا گؤردون كی یالنیز
جیسمانی آغرینئ كسه بیلرسن...
بیر خالقین معنوی آغریلارینا
علاجئ ، قارداشیم قلمده گؤردون
گوندوزلر بیچاقلا كسمك بیر یانا
گئجه لر الینه قلم گؤتوردون.
یارئ یا بؤلونموش آنا وطنین
بو گون سندن اومور دردینه ملهم.
قارداش قوشالاشدئ سیلاحین سنین
گوندوزلر – بیچاقدیر ، گئجه لر – قلم .
سن سؤزه چئویردین ایضطیرابلارئ
یازدین ، بیر حسرتدن مین درد گؤیردی.
الینده بیرینین آزار – بئزارئ
الینده بیر خالقین یوز ایللیك دردی.
گئجه ده ، گوندوزده هئی دؤیوشورسن
معنوی ، جیسمانی آغریلارلا سن.
حكیم نوسخه لری یازدین همیشه
خسته ن شفا تاپیب ساغالدئ...فقط
ادیب قلمله یازدیغین نوسخه
بیر خالقین دردینه شفادیر البت!
یاز كی ، بوتؤو ایدیك ، پارچالانمیشیق
او تایدان دونیایا سسین اوجالسین.
یازكی ، قلمیندن سوزولن ایشیق
وطندن وطنه بیر كؤرپو سالسین!
رحمتلیك بختیار واهابزاده-1982
بؤلوم : دكتر جواد هیئت از نگاه دیگران (دوكتور جواد هئیته عایید دوشونجه لر) یازار : VARLIQ 0 باخیش